أكد شهود عيان أن قوة مسلحة قامت بإعتقال الناشط مهادن الزعيم من داخل قرية أم دوانة التابعة لمحلية الحصاحيصا بولاية الجزيرة بسبب منشور كتبته علي صفحته بالفيس بوك تناول فيه ظاهرة حلاقة رؤوس الشباب في القرية من قبل قوة مسلحة وفيما يلي نص المنشور :
(هل شعر شوية شباب في قرية نائية بولاية الجزيرة اصبح من مهددات الامن القومي ، كان في زول فاهم حاجة ياريت يكلمنا ، قوة لابسة كاكي ودارعين علامات الشرطة العسكرية هاجمت حلتنا قبل قليل وحلقوا لاي زول شعره خصوصاً الشباب الاطفال ووصل الامر لمطاردة الشباب في الشوارع واطلاق الرصاص في الجو وفي شباب وقعوا في الترع وفي شاب قرب يموت بحادث وهو جاري منهم ، ادخلوا رعب في قلوب الناس لانهم شغالين بذات منهج الجنجويد في الهجوم، المصيبة انو مافي زول عارف هم منو ولا تابعين لي وين واستهدفوا الشباب الصغار في العمر وبختو ليهم السلاح في راسهم (ذل واهانة بذات طريقة الجنجويد) وصل لدرجة اقتحام البيوت عشان يحلقوا شعر شاب؟ السادة في قيادة القوات النظامية بولاية الجزيرة محلية الحصاحيصا وحدة طابت الادارية هل الناس الهاجمونا في قرية امدوانة ديل تابعين ليكم ولا مليشيات ساكت ؟ لو تابعين ليكم ياريت تورونا الهدف شنو من حلاقة شعر الشباب والاطفال ؟ ولو ما تابعين ليكم خلونا نشيل عكاكيزنا ونطلع عليهم لانو الموضوع دا لو استمر حا ينتهي بكارثة ؟) .
