▪️خلونا في الصورة
▪️صباح أحمد
يعني هسع كامل إدريس دا عاوز يقنعنا إنو مشكلة البلد سببها الوزيرة والمستشارين الاتنين الإعفاهم ديل؟!
وكأن أزمة السودان الكبيرة متلخصة في شخص أو شخصين في مكتب رئيس الوزراء.
الحقيقة إنو الكلام ده تبسيط مُخلّ للازمة والواقع.
مشكلة البلد أكبر بكتير من وزيرة أو مستشارين يعفوهم أو يخلوهم..
وبعدين البلد أصلاً في حالة حرب ومن غير المنطقي إنها تُدار بجهاز حكومي مترهل ومكدّس بالوزراء والمستشارين وكأننا في زمن رخاء وإستقرار!
ولو المسألة مسألة إعفاءات بس فالأوفق كان يعفي كل الوزراء ويحل الحكومة وفي النهاية يعفي نفسه و يطفي النور ويطلع ويقفل الباب وراه
ويسلّمنا المفتاح!
بصراحة..البلد في وضع زي دا ما محتاجة الكم الهائل دا من المسؤولين ولا الصرف والمخصصات والمرتبات البترهق خزينة الدولة وهي أصلاً مرهقة بالحرب والأزمات.
المفروض تكون في حكومة حرب مصغّرة ومحدودة، تدير الضروري فقط.. الأمن، والخدمات الأساسية، وتسيير شؤون الناس لحدي ما الحرب تنتهي.
لكن الحاصل عكس كده… تضخم في المناصب وكأنو البلد ناقصة كراسي!
بعدين..وينها البلد المحتاجة لكل هذا التضخم في المناصب؟!
البلد غرقانة في الحرب وألازمات..
لكن الكراسي لسة ماشة زائدة وخاضعة للمحاصصات والمجاملات!
