مقالات الرأي
أخر الأخبار

من شاي الصباح إلى الغداء.. “يا قلييب مافيش دبارة”!

■ خلونا في الصورة

■ صباح أحمد

▪︎ خلونا نحسبها بالحساب كدا، ونشوف الأسرة السودانية المتوسطة، المكوّنة من 4 إلى 6 أفراد، محتاجة تصرف كم في اليوم عشان توفر الحد الأدنى من الأكل والشراب.. لا رفاهية، ولا أصناف متعددة، ولا حتى حياة فيها قدر معقول من الراحة.. مجرد محاولة لتدبير المعيشة ومواجهة الجوع!

خلونا نبدأها من شاي الصباح…

▪︎ شاي الصباح:

  • نص كيلو سكر: 6 آلاف جنيه.
  • لبن بودرة: 6 آلاف جنيه، أو رطل ونص لبن حليب بحوالي 7 آلاف جنيه. (عندنا في الدامر رطل اللبن بي 4 آلاف إلى 4500 جنيه).
  • شاي حب: ألفان جنيه.

▪︎ المجموع: 14 ألف جنيه باللبن البودرة، أو 15 ألفاً تقريباً باللبن الحليب.

ودا من غير بسكويت للعيال، ولا رغيف، ولا فحم، ومن غير ما نحسب تكلفة الغاز أو الكهرباء لو عندك هيتر.

▪︎ نجي للفطور:

  • فول: 5 آلاف جنيه، لأنو فول بي 3 آلاف جنيه ما بكفي نفرين.
  • زيت فول: 5 آلاف جنيه.
  • جبنة: 3 آلاف جنيه.
  • عيش: 8 آلاف جنيه، ودي بتجيب ليك 12 عيشة صغيرة.

وطبعاً بشرط تطلع بدري عشان تلحق تقيف في صف العيش، ولو اتأخرت أقل شيء حتقضي ساعة ويمكن أكتر، في حال الكهرباء شغالة.. أما لو الكهرباء قاطعة فممكن ساعتين ما تحلك!

▪︎ المجموع: 21 ألف جنيه.

لاحظوا إنو الفطور عبارة عن فول بالجبنة والزيت بس، من غير طماطم ولا بصل ولا أي إضافات تانية.. لا بيض، لا سلطة، لا طعمية؛ لأنو طعميتين بس بي ألف جنيه، ومافي سلطة أقل من 10 آلاف جنيه، أما البيضة الواحدة فسعرها بين 1500 و2000 جنيه.

▪︎ أها نجي للغداء:

  • ربع كيلو لحمة: 15 ألف جنيه.
  • بصل: 5 آلاف جنيه.
  • ظرف صلصة: 2500 إلى 3 آلاف جنيه.
  • بطاطس مثلاً: 10 آلاف جنيه.
  • توم: 3 آلاف جنيه.
  • زيت ملاح: 5 آلاف جنيه.
  • عيش: 10 إلى 12 ألف جنيه.

▪︎ المجموع: حوالي 50.5 إلى 53 ألف جنيه.

وبرضو لاحظوا إنو دا مجرد صحن ملاح في الصينية، من غير أي إضافات.. لا رز، ولا مكرونة، ولا سجوك، ولا حتى سلطة خضرا، ولا شطة خضرا؛ لأن أقل كمية شطة برضو عندها حسابها.. 3 آلاف جنيه، قدر الشطة الفي الصورة دي!

وطبعاً لو قلت تجيب فراخ، كيلو الفراخ ما أقل من 40 ألف جنيه، والعجب لو فراخ صافي.. وزمان الكيلو اتجاوز الـ65 ألف جنيه!

▪︎ أها نحسبها:

بالميت كدا يا سيدي، الأسرة محتاجة يومياً حوالي 90 ألف جنيه، وممكن تصل إلى 100 ألف جنيه، عشان توفر شاي الصباح والفطور والغداء فقط!

دا طبعاً من غير حق المدارس لو عندك أولاد في المدارس أو الجامعات، ومن غير المواصلات، ولا صابون الغسيل والحمام، ولا البن والجنزبيل لو بتشرب قهوة، ولا أي نوع من الفواكه، حتى لو كيلو موز واحد!

ومن غير عشاء، ولا شاي مغرب، ولا لبن حليب للعيال، ولا… ولا… ولا.

▪︎ يعني لو حسبنا المصروف اليومي على أساس 100 ألف جنيه، حتحتاج في الشهر حوالي 3 ملايين جنيه، ودا للأكل والشراب المذكورين بس، فما بالك ببقية الالتزامات؟!

وطبعاً ما حسبنا الإيجار لو ما عندك بيت ملك، وأقل إيجار بقى مبلغ وقدره.. ولا الكهرباء والموية، ولا الصابون والغاز أو الفحم، ولا الفواكه والمجاملات، ولا الرصيد وخدمة الإنترنت، ولا أي مصاريف طارئة.

وإن شاء الله ما يمرض ليك زول، أو شبشبك يتقطع، أو يكون عندك مشوار ضروري، أو تضطر تركب مواصلات، أو يجوك ضيوف، أو تحتاج تشتري ملابس حتى لو ملابس داخلية.. ولا… ولا… ولا!

▪︎ ملحوظة مهمة:

طبعاً ما كل يوم الناس بتاكل لحمة، وغالباً بتكون مرة أو مرتين في الأسبوع، ويمكن نص كيلو السكر دا يكفي يوم والتاني.. لكن اللبن البي 6 آلاف دا، الشاي حق يوم واحد زاتو ما بشربك!

▪︎ طيب.. نجي للسؤال الأهم:

المرتبات كم؟!

هل في موظف مرتبه 3 أو 4 ملايين جنيه في الشهر؟!

هل في عامل عنده قروش قدر دي؟!

والزول الشغال رزق اليوم باليوم، هل بيقدر يوفر حتى ربع المبلغ دا؟!

لا طبعاً..

أها.. كيف البصارة؟!

والدبارة كيفنها؟!

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى