▪️خلونا في الصورة
▪️صباح أحمد
▪️زمان، القيادي بجماعة الاخوان المسلمين الشيخ سليمان أبو نارو ربنا يرحمه قال في ندوة :إنو ناس الإنقاذ بيفتشوا للشيوعيين تحت الأرض عشان يتحاوروا معاهم، ونحن القاعدين فوق الأرض ما شغالين بينا الشغلة!
وبالضبط.. دا حالنا الآن مع ناس الحكومة..
نحن القعدنا في البلد وما فارقناها، نزحنا واتشردنا، فقدنا أماننا وبيوتنا وشقاء عمرنا، وتحملنا ما لا يُحتمل، ومع ذلك تمسكنا بالأمل.
ولما قلنا نرجع بيوتنا، ونعمر الخرطوم، ونطبع الحياة من جديد، الحكومة إستخسرت فينا الدعم، وتركتنا نواجه مصيرنا برانا.
بينما تفتح أبواب المكأفاة والتقدير لمن كانوا سبباً في القتل والخراب والدمار والنهب والسلب ويُعاملوا وكأنهم أبطال، وتُهدى لهم السيارات الرئاسية كما ورد في الاخبار!
واضح جداً إنو في البلد دي إنو القيمة ما للصابر.. القيمة لِلـ شايل سلاح بس.
وإذا كان دا هو الميزان، فالصابر خاسر، والماسك سلاح هو الرابح بلا شك.
